Японияда Ferrari 458 Spider биринчи ҳайдашда ёниб кетди
306 минг АҚШ долларлик машина 20 дақиқада кулга айланди.
Японияда 33 ёшли эркак 10 йил давомида пул йиғиб сотиб олган Ferrari автомобили биринчи ҳайдашдан атиги бир соат ўтиб ёниб кетди.
Хонкон исмли эркак узоқ кутилган Ferrari 458 Spider моделини харид қилганидан сўнг Токиодаги Шуто экспресс йўлида тест-драйвга чиққан. Ҳайдовчилик вақтида у автомобиль атрофида оқ тутунни пайқаб қолган ва дастлаб бу бошқа машинага тегишли деб ўйлаган. Аммо тутун айнан ўзининг автомобилидан чиқаётганини фаҳмлаганида, машинани йўл четига тўхтатиб, зудлик билан ўт ўчириш хизматига мурожаат қилган.
Шундан сўнг, у 43 миллион иен (тахминан 306 минг АҚШ доллари) эвазига сотиб олган орзуси қандай ёниб кетганини 20 дақиқа давомида кўзлари билан кузатган. “Мен Японияда бу муаммога учраган ягона одамман деб ўйлайман. Менда фақат суратлар қолди”, — деб ёзди у ижтимоий тармоқларда.
Маҳаллий полиция тергов бошлаганини ва дастлабки гумонга кўра, ёнғин автомобилнинг двигатель қисмида бошланганини маълум қилди. Ҳодиса юзасидан тўлиқ текширув давом этмоқда.
