Ғазода 600 минг бола вакцина тақчиллиги сабаб ногиронлик хавфи остида
Ҳозирда Ғазода полиомиелит ва қизамиқ хавфи кучайган.
Ғазо Соғлиқни сақлаш вазирлиги бош директори доктор Мунир ал-Буршнинг таъкидлашича, Исроил томонидан вакциналарни сектор ҳудудига олиб кириш қатъиян тақиқлангани сабабли 600 мингдан ортиқ бола тузалмас ногиронлик — хусусан, болалар фалажи (полиомиелит) ва бошқа оғир сурункали касалликлар хавфи остида қолмоқда.
Муаммо фақат полиомиелит эмас. Маҳаллий журналистларнинг маълум қилишича, Ғазода эндиликда қизамиқ касаллиги ҳам болалар орасида кенг тарқала бошлаган. Бу эса мавжуд инқирозни янада чуқурлаштириб, эпидемиологик портлаш хавфини туғдирмоқда.
БМТ, Жаҳон соғлиқни сақлаш ташкилоти ва бошқа халқаро ташкилотлар бу каби соғлиқни сақлаш бўйича санкцияларни инсон ҳуқуқлари ва болалар саломатлигига бевосита таҳдид сифатида баҳоламоқда. Ғазо секторида аллақачон озиқ-овқат, сув ва дори-дармон етишмовчилиги ҳукм сураётгани инобатга олинса, вакцина тақчиллиги фожиали оқибатларга олиб келиши мумкин.
