Ҳиндистон ва Покистон ўртасидаги дипломатик уруш авж олмоқда
Покистон фуқаролари Ҳиндистондан чиқариб юборилади.
Кашмирда содир бўлган теракт ортидан Ҳиндистон ва Покистон ўртасидаги зиддият кескинлашди. Ҳиндистон ҳукумати Покистон фуқаролари ва дипломатик вакилларига қарши қатор қатъий чораларни кўрмоқда.
Ҳиндистон Покистон элчихонасидаги Мудофаа вазирлигига алоқадор барча атташеларни мамлакатдан чиқариб юборди. Шунингдек, Исломободдаги Ҳиндистон элчихонаси ходимлари ортга чақириб олинмоқда, бу икки давлат ўртасидаги дипломатик инқирозни янада чуқурлаштирмоқда.
Янги Деҳлидаги Покистон элчихонаси ходимларига эса Ҳиндистонни тарк этиш учун бир ҳафта муҳлат берилди.
Бундан ташқари, Ҳиндистон ҳукумати Покистон билан чегараларни вақтинча ёпишга қарор қилди. Бу эса икки мамлакат ўртасидаги савдо ва одамларга оид ҳаракатларга жиддий таъсир кўрсатади.
Ҳиндистон мудофаа вазири эртага парламент аъзолари учун ёпиқ эшиклар ортида брифинг ўтказади. Унда терактга муносабат ва Ҳиндистоннинг ҳарбий-ижро сиёсати муҳокама қилиниши кутилмоқда.
Покистон эса бўш қолгани йўқ. Бош вазирнинг топшириғига кўра, эртага Хавфсизлик Кенгашининг фавқулодда йиғилиши чақирилади, унда Ҳиндистонга нисбатан жавоб чораларини ишлаб чиқиш режалаштирилмоқда.
Ушбу ҳолат Жанубий Осиёда аллақачон таранг бўлган геосиёсий вазиятни янада мураккаблаштирмоқда.
