Россия Киевга ракета ва дронлар ҳужуми уюштирди
Ҳужум оқибатида 9 киши ҳалок бўлган.
24 апрелга ўтар кечаси Россия Қуролли кучлари томонидан Киев шаҳри ракета ва дронлар ёрдамида нишонга олинди. Украина Фавқулодда ҳолатлар хизмати берган расмий маълумотга кўра, ҳужум натижасида камида тўққиз киши ҳалок бўлган, 63 киши тан жароҳати олган, улардан 42 нафари шифохонага ётқизилган, жумладан олти нафар бола ҳам бор.
Расмий баёнотда айтилишича, қутқарувчилар вайрон бўлган яшаш бинолари остидан тирик қолганларни излашни давом эттирмоқда.
“Тунда амалга оширилган ҳужум оқибатларини бартараф этиш ишлари ҳозирда пойтахтнинг бешта туманида давом этмоқда,” — дейилади Фавқулодда ҳолатлар давлат хизматининг хабарида.
Бу ҳужум Киевга қаратилган сўнгги ойлардаги энг йирик ва кўп қурбонларга олиб келган зарба сифатида баҳоланмоқда.
