Россия 100 дан ортиқ украин дронини уриб туширди
Дрон ҳужуми оқибатида 13 та аэропорт фаолияти тўхтилган.
Россия Мудофаа вазирлиги ўтган тунда Украинадан учирилган 105 та дрон мамлакат ҳаво мудофаа тизимлари томонидан йўқ қилинганини билдирди. Бу ҳақда расмий баёнотда соат 21:00 дан эрталабки 04:00 гача давом этган ҳужум тафсилотлари келтириб ўтилган.
Москва мери Сергей Собяниннинг сўзларига кўра, ҳужум пайтида пойтахтга йўналган 19 та дрон муваффақиятли уриб туширилган. Қолган дронлар эса Россиянинг бошқа ҳудудларида, хусусан, бир нечта вилоятларда тўхтатилган.
Дронлар ҳужуми туфайли Россиянинг қатор аэропортларида парвозлар вақтинча тўхтатилди. “RBK”нинг ёзишича, 6 майга ўтар кечаси 13 та аэропортда, жумладан, Москванинг тўртта аэропорти ҳамда Самара, Казан, Волгоград, Саратов, Иваново, Ярославл, Калуга ва бошқа шаҳарлардаги аэропортларда хавфсизлик чоралари кўрилди ва парвозлар чеклаб қўйилди.
