Тошкентда ноқонуний бошланган кўп қаватли уйнинг қурилиши тупроқ ўпирилишига сабаб бўлди
Натижада, қўшни ҳудуд атрофидаги кўп қаватли уйнинг ҳовлисига ҳам зарар етган.
Ижтимоий тармоқларда Яккасарой тумани, Салар кўчаси, “Дилбулоқ” маҳалласидаги кўп қаватли уйлар ҳудудида ер чўкиши юзага келгани ҳақида тарқалган хабар бўйича расмий изоҳ берилди.
Маълум қилинишича, мазкур ҳудуддаги қурилиш ишлари “ЛЮКС ЛОЙИҲА” МЧЖ томонидан тасдиқланган лойиҳа ҳужжатлари асосида амалга оширилмоқда. Лойиҳа учун “Архитектура ва шаҳарсозлик кенгаши” ишчи органи ҳамда “Шаҳарсозлик ҳужжатлари экспертизаси” ДУКнинг ижобий хулосалари ҳам олинган. Қурилиш объектининг А-блоки Тошкент шаҳар Қурилиш ва уй-жой коммунал хўжалиги соҳасида ҳудудий назорат қилиш инспекциясидан белгиланган тартибда рўйхатдан ўтган. Шу кунга қадар инспекция объектда 10 марта мониторинг ўтказиб, 11 та ёзма кўрсатма берган ва буюртмачини икки марта маъмурий жавобгарликка тортган.
Бироқ G4-блок бўйича вазият бошқача экани айтилмоқда. Ушбу блок “Архитектура ва шаҳарсозлик кенгаши”дан ижобий хулоса олган бўлса-да, “Шаҳарсозлик ҳужжатлари экспертизаси” ДУКдан хулоса олинмаган. Шу сабабли бу блок инспекцияда рўйхатдан ўтмаган ва қурилиш ишлари ноқонуний бошланган. Ҳолат юзасидан тегишли ҳужжатлар ҳуқуқни муҳофаза қилувчи органларга юборилган.
Шунингдек, текширувларда аниқланишича, буюртмачи “ЎЗКОММАИШИЙСАВДО” МЧЖ томонидан G4-блок учун котлован қазиш ишлари олиб борилаётганда ҳудуддаги электр трансформаторида носозлик юзага келган. Натижада, котловандаги сизот суларини чиқариш имкони бўлмаган, сув даражаси кўтарилиб кетган ва қўшни “Гранд Капитал” МЧЖ томонидан илгари қурилган ерости автомашина тураржойи остидаги қайта кўмилган жойларда тупроқ силжиши кузатилган. Бу ҳолат сирпанишга сабаб бўлган.
Ҳозирда инспекция томонидан ушбу вазият бўйича қўшимча ўрганиш ишлари олиб борилмоқда.
