Наманганда террористик ташкилот таъсирига тушган 21 киши қўлга олинди
Улардан икки нафари яширинча никоҳдан ўтиб, жанговар ҳаракатлар олиб борилаётган ҳудудларга ҳижрат қилишни режалаштирган.
Наманган вилоятида “Ислом давлати” террористик ташкилоти ғоялари таъсирига тушган 21 нафар шахс қўлга олинди. Бу ҳақда Давлат хавфсизлик хизмати (ДХХ) хабар берди.
Маълум қилинишича, Поп туманида яшовчи бир фуқаро ижтимоий тармоқларда ноқонуний каналлар очиб, террористик ғояларни тарғиб қилган. У Жанубий Кореяда ишлаётган Фарғона вилоятидаги бошқа бир шахс билан алоқа ўрнатиб, унинг виртуал таъсирида ноқонуний фаолиятга қўшилган.
Тергов маълумотларига кўра, ушбу шахслар яқин қариндошлари ва маҳалладошларини ҳам гуруҳга жалб қилиб, экстремистик материаллар — қонли жангариликлар, қатллар саҳналари ва давлат тузумига қарши чақириқларни тарқатган. Маълумотга кўра, улардан икки нафари яширинча никоҳдан ўтиб, ота-оналарига билдирмасдан жанговар ҳаракатлар олиб борилаётган ҳудудларга ҳижрат қилишни режалаштирган.
Қўлга олинганлардан бири қилган ишлари учун пушаймонлигини билдирган. У “террорчиларнинг материалларини тарқатганини, Мисрга бориб ъилм олишʼ ва кейинчалик жиҳод қилишни режалаштирганини”, аммо бу йўлнинг хато эканини англаганини таъкидлаган.
Ҳозирда 4 нафар етакчига нисбатан Жиноят кодексининг 244-1 ва 244-2-моддалари бўйича жиноят иши қўзғатилди. Уларнинг 2 нафари қамоққа олинган, қолган 17 киши бўйича тергов ҳаракатлари давом этмоқда.
