Наманганда 6 йил олдин уйи бузилган фуқаро компенсация олди
Ҳоким қарори билан бузилган уй учун берилмаган товон пули суд орқали ҳал қилинди.
Наманган вилояти адлия бошқармаси маълум қилишича, 2017 йилда наманганлик фуқаролардан бирининг уйи давлат эҳтиёжлари учун бузиб ташланган, бироқ эгасига тегишли компенсация ўз вақтида тўланмаган.
Ҳуқуқшунослар мурожаатни ўрганар экан, мазкур уй Наманган шаҳар ҳокимининг 2017 йил 21 августдаги қарори асосида бузилганини аниқлади. Шу билан бирга, уй-жойни бузиш ишлари давлат манфаатлари учун амалга оширилган бўлса-да, товон пули белгиланган тартибда берилмагани маълум бўлди.
Фуқарога етказилган моддий зарарни қоплаш мақсадида адлия органлари юридик ёрдам кўрсатиб, Наманган туманлараро судига даъво аризаси киритди. Суд қарори билан фуқаро фойдасига 200 миллион сўм миқдорида компенсация ундирилди.
Мазкур ҳолат адлия органлари томонидан фуқароларнинг мулкий ҳуқуқлари ҳимоя қилинаётганини яна бир бор кўрсатиб бермоқда.
