Самарқандда 44 гектар майдонда Имом Бухорий мажмуаси бунёд этилмоқда

Ўзбекистон Республикаси Президенти Шавкат Мирзиёев 25 август куни Самарқанд вилоятига ташриф буюрди. Анъанага кўра, аввало Имом Бухорий мақбараси зиёрат қилиниб, Қуръон тиловат қилинди ва дуолар ўқилди.

 

Давлатимиз раҳбари зиёратгоҳ ҳудудида олиб борилаётган кенг кўламли қурилиш ва ободонлаштириш ишларини кўздан кечирди. Буюк муҳаддис бобомизга бутун ислом оламида бўлган юксак эҳтиромни инобатга олиб, бу ерда зиёратчилар учун кенг имкониятлар яратишга қаратилган улкан мажмуа барпо этилмоқда.

 

Мажмуа умумий 44 гектар майдонда бунёд этилиб, муқаддас мақбара, 10 минг намозхонга мўлжалланган масжид, маъмурий бино ва 75 метр баландликдаги миноро иншоотлари қад ростлади. Ҳозирда пардозлаш ишлари олиб борилмоқда. Айвон ва пештоқларга “Саҳиҳи Бухорий”дан ҳадислар нақш этилмоқда.

 

Президентимиз ушбу маскан нафақат зиёратгоҳ, балки илм-маърифат, тарбия ва ибрат ўчоғи бўлиши зарурлигини таъкидлади. Имом Бухорийнинг илмий мероси ёшлар учун буюк намуна эканлиги алоҳида қайд этилди. Шу мақсадда янги мажмуада замонавий музей ташкил қилинмоқда. Унда Имом Бухорий ҳаёти, ҳадис илмидаги улкан мероси, шунингдек Қуръонда зикр этилган пайғамбарлар тарихи, Муҳаммад (с.а.в.) шаражаси ва муқаддас Макка ҳамда Мадина ҳаётига оид маълумотлар акс этади.

 

Зиёратгоҳ атрофида меҳмонхона ва бошқа хизмат кўрсатиш масканлари ҳам қурилмоқда. Президентимиз ишларини сифатли якунлаш, ташриф буюрувчилар учун янада қулайликлар яратиш ва мажмуа атрофида кўкаламзорлаштириш ишларини кенгайтириш юзасидан топшириқлар берди.