Мўйноқдаги газ отилиб чиққан қудуқ бир ойдан сўнг жиловланди
Қудуқ турли бахтсиз ҳодисалар ва талафотларсиз жиловланган.
26 июль куни Қорақалпоғистон Республикаси Мўйноқ майдонидаги “Ўзбекнефтгаз” АЖга қарашли янги, лойиҳавий чуқурлиги 5000 метр бўлган 1-сон излов қудуғида тўсатдан газ отилиб чиққанди.
“Ўзбекнефтгаз” АЖ ҳолат бўйича қўшимча маълумот бериб, айни пайтда газ қудуғи муваффақиятли жиловланганини билдирди.
Қайд этилишича, содир бўлган газ отқинини бартараф этиш учун “Ўзбекнефтгаз” АЖ томонидан кечаю-кундуз иш олиб борувчи тезкор штаб ташкил қилинган.
Махсус штаб томонидан газ отқинини бартараф этишга қаратилган тезкор “Йўл харитаси” ишлаб чиқилган ва ишлар босқичма-босқич ҳамкор ташкилотлар кўмагида амалга оширилган.
Бугунги кун ҳолатига кўра, “Йўл харитаси”даги барча ишлар муваффақиятли бажарилиб, қудуқни бошқариш имкони яратилган. Қудуқ турли бахтсиз ҳодисалар ва талафотларсиз жиловланган.
