“Ўзбекистонга ташриф буюриш ҳақидаги орзуйим амалга ошганидан чин дилдан хурсандман”

Бугун Япония ташқи ишлар вазири Ивая Такеши Ўзбекистонга расмий ташриф билан келди. Уни Тошкент халқаро аэропортида Ўзбекистон ташқи ишлар вазири Бахтиёр Саидов кутиб олди. Расмий учрашув Ташқи ишлар вазирлигида бўлиб ўтди.

 

Ташриф доирасида Ивая Такеши Самарқанд шаҳрига ҳам бориб, нафақат шаҳарнинг бой маданий мероси, балки унинг иқтисодий салоҳияти, келажакдаги ҳамкорлик имкониятлари ва япон компаниялари билан амалга оширилаётган қўшма лойиҳалар билан ҳам танишди. “Юртингизга ташриф буюриш бўйича бир неча йиллик орзуйим амалга ошганидан чин дилдан хурсандман”, деди вазир.

 

Музокаралар давомида томонлар икки давлат ўртасидаги сиёсий, иқтисодий, таълим, IT, транспорт, кончилик ва “яшил” энергетика каби соҳалардаги ҳамкорликни янада кенгайтириш масалаларини муҳокама қилди. Хусусан, кимё саноати ва энергетика бўйича йирик қўшма лойиҳаларни амалга ошириш юзасидан фикр алмашилди.

 

Учрашув якунида Ўзбекистон ва Япония ташқи ишлар вазирликлари ўртасида Стратегик диалог бўйича қўшма коммюнике имзоланди. Ушбу ҳужжат икки мамлакат ўртасидаги дўстона ва ишончли муносабатларни янги босқичга олиб чиқиши, сиёсатдан тортиб иқтисодиёт ва халқаро алоқаларгача бўлган барча йўналишларда ҳамкорликни мустаҳкамлаши кутилмоқда.