Жиззахда отаси шафқатсизларча калтаклаган болалар ҳимояга олинди
Отага жиноят иши қўзғатилди.
Ижтимоий тармоқларда ота томонидан икки нафар вояга етмаган фарзандига нисбатан зўравонлик қилинаётгани акс этган видеoтасвирлар тарқалди. Мазкур ҳолат юзасидан Шароф Рашидов тумани ИИБ томонидан Ўзбекистон Республикаси Жиноят кодексининг 110-моддаси (қийнаш) 2-қисми “а” банди билан жиноят иши қўзғатилди.
Ҳозирда гумон қилинувчининг хатти-ҳаракатларига ҳуқуқий баҳо бериш бўйича тергов ҳаракатлари олиб борилмоқда. Вояга етмаган икки нафар бола эса ички ишлар органлари ҳузуридаги вояга етмаганларга ижтимоий-ҳуқуқий ёрдам кўрсатиш марказига жойлаштирилган.
Болалар омбудсманининг Жиззах вилоятидаги минтақавий вакили ва мутасадди ташкилотлар томонидан ҳолат ўрганилмоқда. Аниқланишича, зўравонлик оилавий низо оқибатида содир этилган.
Болаларнинг хавфсизлигини таъминлаш, уларга зарур психологик ва ижтимоий ёрдам кўрсатиш мақсадида ички ишлар органлари ва Ижтимоий ҳимоя миллий агентлигининг ҳудудий “Инсон” маркази мутахассислари томонидан тегишли чоралар кўрилмоқда.
Ҳолат юзасидан Болалар омбудсмани кузатувни давом эттирмоқда. Бу борада қўшимча ахборот берилиши белгиланган.
