Россияда ўзбекистонлик фуқаро “қул” деб ҳақоратланди
Ўзбекистон ТИВ Россиядаги фуқаролар давлат ҳимоясида эканини эслатди.
Аввалроқ ижтимоий тармоқда Россияда ўзбекистонлик ҳайдовчи ҳақоратлангани, маҳаллий фуқаро уни “қулсан” деб атагани акс этган видео тарқалиб, кенг муҳокамаларга сабаб бўлганди.
Ҳолатга Ўзбекистон Ташқи ишлар вазирлиги муносабат билдириб, фуқаролар давлат ҳимоясида эканини яна бир бор эслатди.
“Ўзбекистон Республикаси Ташқи ишлар вазирлиги Ўзбекистон Конституцияси, миллий қонунлар ва халқаро ҳуқуқнинг умумеътироф этилган принциплари ҳамда нормаларига асосан, Ўзбекистон фуқаролари дунёнинг исталган нуқтасида бўлишидан қатъий назар, давлат ҳимоясида эканини таъкидлайди.
Агар фуқароларнинг ҳуқуқлари, эркинликлари, қонуний манфаатлари ёки қадр-қиммати хорижда бузилса, улар дарҳол қабул қилувчи давлатнинг ваколатли ҳуқуқ-тартибот органларига мурожаат қилишлари зарур. Шунингдек, фуқаролар Ўзбекистоннинг дипломатик ваколатхоналари ёки консуллик муассасаларига ҳуқуқий ва консуллик ёрдами сўраб мурожаат қилиши мумкин.
Фуқароларимизни хорижда ҳимоя қилиш давлат сиёсатининг муҳим йўналиши эканини ҳамда бу масъулият давлатнинг ўз фуқаролари олдидаги мажбуриятлари асосида амалга оширилишини яна бир бор эслатиб таъкидлаймиз”, дейилади муносабатда.
