Тошкент метрополитенида кассирлик лавозими бекор қилинади
Ишдан бўшатилган ходимлар бошқа касбларга ўқитилади.
“Тошкент метрополитини” ДУК томонидан йўловчиларга хизмат кўрсатиш тизимини модернизация қилиш ишлари давом эттирилмоқда. 2025 йил охирига қадар барча бекатларда чипталарни нақд ёки электрон шаклда харид қилиш имконини берувчи автоматлаштирилган терминаллар ўрнатилиши режалаштирилган.
Мазкур янгиланиш натижасида кассирлик лавозими босқичма-босқич қисқартирилиб, кейинчалик бутунлай бекор қилинади. Шу муносабат билан, метрополитен маъмурияти ўз ходимларини қўллаб-қувватлаш мақсадида уларни касбий қайта тайёрлаш дастурларига жалб этмоқда.
Ходимларга бухгалтерия ҳисоби, тикувчилик, қандолатчилик ва бошқа соҳалар бўйича малака ошириш курслари таклиф қилинмоқда. Ушбу ўқув курсларининг барча харажатлари “Тошкент метрополитини” томонидан қоплаб берилади.
Метрополитен раҳбарияти мазкур ислоҳот нафақат йўловчилар учун қўшимча қулайликлар яратишини, балки ходимларга янги касб эгаллаш орқали келгусида муносиб фаолият юритиш имконини беришини таъкидлаб ўтди.
