2030 йилгача барча шаҳарларда “яшил шаҳар” стандартлари жорий қилинади

Шавкат Мирзиёев ўз нутқида мамлакатимиз иқтисодиёти жадал ривожланаётгани, аҳолининг кўпайиши билан бирга хавфсиз ва барқарор энергия манбаларига эҳтиёж ортиб бораётганини таъкидлади.

 

Сўнгги саккиз йил давомида истеъмолчилар сони 25 фоизга, яъни 1,6 миллионтага, энергия истеъмоли эса 54 фоизга ёки қўшимча 25 миллиард киловатт-соатга ошгани қайд этилди. Шу боис “яшил” энергия улушини ошириш борасида мисли кўрилмаган қадамлар қўйилди.

 

Натижада электр ишлаб чиқариш ҳажми 2016 йилдаги 59 миллиард киловатт-соатдан 85 миллиард киловатт-соатга етди. Келгуси йилда бу кўрсаткич 97 миллиард киловатт-соатдан ошиши кутилмоқда. Жорий йилнинг ўзида 6,5 миллиард киловатт-соат “яшил” энергия ишлаб чиқарилди ва умумий генерация қувватларида унинг улуши 30 фоизга етди.

 

Президент 2030 йилга қадар 35 миллиард долларлик тўғридан-тўғри инвестициялар ҳисобига “яшил” энергия улушини 54 фоизга етказиш режалаштирилганини маълум қилди. “Табиатга меҳрли муносабат орқали келажак авлодларга унумдор ер, мусаффо ҳаво ва соф сувни мерос қолдириш бизнинг муқаддас бурчимиздир”, – деди давлат раҳбари.

 

Шунингдек, охирги саккиз йилда 31 миллион квадрат метрдан ортиқ, яъни қарийб 12 мингта кўп қаватли уй-жой барпо этилгани таъкидланди. Жорий йилнинг ўзида “Янги Ўзбекистон” массивлари ва бошқа ҳудудларда 130 минг хонадондан иборат замонавий уй-жойлар фойдаланишга топширилиши белгиланган.

 

Президент 2030 йилга қадар барча шаҳарларда “яшил шаҳар” стандартлари асосида кўкаламзорлаштириш даражасини 30 фоизга етказиш, экологияга зарарли таъсирларни камайтириш, шунингдек, қишлоқ ва маҳаллаларда замонавий инфратузилма жорий этилишини қайд этди.