Энди ўзбекистонликлар Иорданияга визасиз бора олади
Бу бўйича келишув ҳужжати 25 сентябрдан кучга киради.
Жорий йилнинг 25 сентябрь кунидан Ўзбекистон фуқаролари Иордания Ҳошимий Подшоҳлигига визасиз кириб, у ерда 30 кунгача бўлиб туриши мумкин. Бу ҳақида Ташқи ишлар вазирлиги маълум қилди.
Аввалроқ Самарқандда Шавкат Мирзиёев ва Иордания қироли Абдулла II ибн ал-Ҳусайн ўртасида музокаралар бўлиб ўтганди.
Учрашув доирасида икки томонлама ҳамкорликка оид қатор ҳужжатлар, жумладан, визасиз тартиб жорий этиш тўғрисидаги келишув имзоланганди.
Ҳужжат 25 сентябрдан кучга киради. Бунга қадар Ўзбекистон фуқаролари Иордания визасини ушбу давлатга борганда олишлари мумкин эди.
Визасиз тартиб жорий қилиниши билан Иордания ўзбекистонликлар визасиз кириши мумкин бўлган мамлакатлар сонида 36-давлат бўлади.
