Метрода касса ходимлари оммавий ишдан бўшатиляптими?
Тошкент метрополитени тармоқда тарқалган хабарларга ойдинлик киритди.
Ижтимоий тармоқларда Тошкент метроси бекатларида касса ходимлари оммавий ишдан бўшатилиши айтилган хабарлар тарқалганди. Тошкент метрополитени бунга расмий муносабат билдирди.
Қайд этилишича, сўнгги вақтларда йўловчилар томонидан бир марталик чипталарга бўлган талаб кескин камайиб кетди. Айрим бекатларнинг биттадан вестибюлларидаги кассалар ёпилиб, унинг ўрнига автоматлаштирилган банкоматлар синов тариқасида ўрнатилди.
Шунингдек, йўл ҳақини ундиришнинг шаффофлигини ва тўлақонлигини таъминлаш мақсадида АТТО компанияси томонидан жамоат транспортларида ҳамда Тошкент метрополитени бекатларида электрон тўлов тизимлари жорий этилган.
Бугунги кунда метрополитеннинг 23 бекатида йўл ҳақини нақд пулда тўловни амалга оширмоқчи бўлган фуқароларга 24 та ҚР-кодли чипта чиқариб берувчи инфокискалар ўрнатилган. Бир маротабалик ҚР-кодли чиптанинг нархи метрополитен кассаларида ҳам, инфокиоскаларда ҳам 3 000 сўм этиб белгиланган бўлиб, агар йўловчи томонидан 5 минг, 10 минг ёки ундан юқори бўлган купюралар киритилганда, қолган маблағ фуқаронинг мобил рақамининг ҳисоб рақамига қайтим сифатида ташлаб берилади. Жорий йилнинг якунига қадар метрополитеннинг барча бекатларига 200 та инфокиосклар ўрнатилиши режалаштирилган.
“Метрополитенда автоматлаштирилган тизим ўрнатилиши сабабли қисқаришга тушган ходимлар учун белгиланган тартибда тўрт ойлик лавозим иш ҳаққи миқдорида компенсация ва нафақалар тўлаб берилади. Бундан ташқари, лавозими қисқартирилаётган ходимларни келгусида иш билан таъминлаш мақсадида бухгалтерия, тикувчилик, қандолатчилик каби йўналишлардаги курсларида ўқиши учун харажатлар “Тошкент метрополитени” ДУК томонидан тўлаб берилади”, дейилади расмий муносабатда.
