ННТлар фаолиятига ноқонуний аралашганлик учун жавобгарлик киритилмоқда
Шунингдек, ННТларининг фаолиятни амалга ошириш тартибини бузганлиги учун жавобгарлиги қайта кўриб чиқилмоқда.
Жорий йилнинг 21 август куни Ўзбекистон Республикаси Президенти Ш.М.Мирзиёев томонидан “Айрим қонун ҳужжатларига қўшимча ва ўзгартиришлар киритиш тўғрисида”ги Қонун имзоланди.
Мақсад - ижтимоий-иқтисодий соҳада жамоатчилик назоратини кучайтириш, нодавлат нотижорат ташкилотлари фаолиятининг эркинлиги кафолатларини мустаҳкамлаш ҳамда ҳомийлик хайрияларини йиғиш тартибини аниқ белгилаш.
Ўзбекистон Республикасининг Маъмурий жавобгарлик тўғрисидаги кодексида ННТларининг фаолиятига қонунга хилоф равишда аралашганлик, жамоатчилик назоратини амалга ошириш натижалари бўйича тайёрланган якуний ҳужжатни кўриб чиқмаганлик учун жавобгарлик белгиланмоқда, шунингдек, ННТларининг фаолиятни амалга ошириш тартибини бузганлиги учун жавобгарлиги қайта кўриб чиқилмоқда.
Жумладан:
– қонунчилигимизда биринчи маротаба ННТнинг фаолиятига қонунга хилоф равишда аралашганлик учун (1978-модда) 2,8 млн сўмдан 6,1 млн сўмгача жарима белгиланмоқда.
– жамоатчилик назоратини амалга ошириш натижалари бўйича тайёрланган якуний ҳужжатни белгиланган муддатда кўриб чиқмаганлик учун (1987-модда) давлат органлари мансабдор шахсларига 1,2 млн сўмдан 2 млн сўмгача жарима белгиланмоқда;
– ННТ фаолиятини амалга ошириш тартибини бузиш билан боғлиқ айрим ҳуқуқбузарликлар учун жарималар ўртача чорак қисмга камайтирилмоқда.
