Ўзбекистонда ўртача умр кўриш ёши 73,8 дан 75,1 ёшга узайди

Президент таъкидлаганидек, мамлакат тараққиёти ва келажак авлод фаровонлиги, энг аввало, сифатли таълим-тарбия ва аҳоли саломатлигини таъминлашга чамбарчас боғлиқдир.

 

Сўнгги саккиз йил давомида таълим тизимида туб ўзгаришлар амалга оширилиб, хусусий сектор билан ҳамкорликда мактабгача таълимдаги ўринлар икки ярим миллионга етказилди, қамров эса 78 фоизга чиқди. Янги мактаблар қурилиши ва мавжудларининг кенгайтирилиши натижасида қўшимча 1 миллион ўқувчи ўрни яратилди. Замонавий дарсликлар ва илғор педагогик ёндашувлар асосида таълим сифати сезиларли даражада яхшиланди.

 

Олий таълимда ҳам катта бурилиш юз берди: қамров 9 фоиздан 42 фоизга кўтарилди. Бугунги кунда талабалар сафининг 53 фоизини хотин-қизлар ташкил этаётгани, шунингдек, дунёнинг нуфузли олийгоҳларида 2 мингдан ортиқ ёшларимиз таҳсил олаётгани алоҳида қайд этилди. Шундан 750 нафари “Эл-юрт умиди” жамғармаси орқали давлат ҳисобидан ўқишни давом эттирмоқда.

 

Сўнгги йилларда тиббиёт соҳаси учун ажратилган маблағлар 6 баравар оширилди, юқори технологияли тиббий хизматлар вилоят ва туман даражасида ҳам йўлга қўйилди. Натижада, ўртача умр кўриш кўрсаткичи 73,8 ёшдан 75,1 ёшга узаяди.

 

Президент: “Биз таълим-тарбия ва аҳоли саломатлиги учун, муаллим ва шифокорларни қўллаб-қувватлаш учун қанча куч ва маблағ талаб қилинса, барчасини сафарбар этамиз”, – дея таъкидлади.

 

Шунингдек, ёшларнинг иқтидор ва ташаббуслари, илм-фан ҳамда спортдаги ютуқлари юртимизнинг халқаро майдондаги нуфузини юксалтираётгани алоҳида қайд этилди. Миллий терма жамоамиз илк бор Жаҳон чемпионати йўлланмасини қўлга киритиб, 34 йиллик орзуну рўёбга чиқарди. Талаба ёшларимиз эса Халқаро ёзги универссиада ўйинларида илк бор ТОП-15 талик қаторида жой олди.

 

Яқинда 19 ва 22 ёшли боксчиларимиз Осиё чемпиони унвонига сазовор бўлди. Шу мақсадда пойтахтимизда Олимпия шаҳарчаси ва Футбол академияси барпо этилиб, ёш спортчилар учун янги имкониятлар яратилди.