Бухоро ва Наманганда интернет-фирибгарлар қўлга тушди

Бухоро вилоятида ҳуқуқни муҳофаза қилувчи органлар томонидан интернет орқали содир этилган фирибгарлик ҳолатлари аниқланди. Бу ҳақда вилоят ИИБ матбуот хизмати маълум қилди.

 

Маълум қилинишича, жорий йилнинг 24 июль куни Ғиждувон туманида яшовчи фуқаро ариза билан мурожаат қилиб, номаълум шахс уни алдаб 4 миллион 175 минг сўм пулини олганини билдирган. Тергов натижаларига кўра, жиноятчи жабрланувчига “ютуқ ютганини” айтиб, уни етказиб бериш учун пул талаб қилган. Жабрланувчи ишониб, кўрсатилган маблағни юбoрган. Олиб борилган тезкор суриштирув чоғида ушбу фирибгарликни 2003 йилда туғилган Қашқадарё вилояти фуқароси содир этгани маълум бўлди.

 

Шунингдек, Наманган вилоятининг Мингбулоқ туманида яшовчи фуқаро ҳам ҳуқуқ-тартибот идораларига мурожаат қилган. У банк пластик картасидан 4 миллион 700 минг сўм маблағи ноқонуний ўтказиб юборилганини айтган. Текширув давомида 2005 йилда туғилган Тошкент вилояти фуқароси жабрланувчининг SMS-хабаридан махфий кодни қўлга киритиб, ушбу маблағларни фирибгарлик йўли билан эгаллагани аниқланган.

 

Ҳар икки ҳолат юзасидан Жиноят кодексининг 168-моддаси (“Фирибгарлик”) 3-қисми билан жиноят иши қўзғатилди. Айбдорлар 8 йилгача озодликдан маҳрум қилиниши мумкин. Ҳозирда уларнинг бошқа жиноятларга алоқадорлиги ҳам текширилмоқда.