Ўзбек-қирғиз чегарасида икки нафар қирғизистонлик фуқаро ҳалок бўлди
Чегарачиларнинг қонуний талабларини бажармаган шахсларга нисбатан ўқотар қурол қўлланилган.
Ўзбекистон ва Қирғизистон чегарасида икки нафар Қирғизистон фуқароси ҳалок бўлди. Қирғизистон Миллий хавфсизлик давлат қўмитаси Чегара хизмати берган маълумотларга кўра, воқеа чегарачилар томонидан фуқароларни қўлга олиш чоғида содир бўлган.
Маълум қилинишиича, шахслар ўзбек чегарачиларининг қонуний талабларига бўйсунмаган ва бунга жавобан ўқотар қурол қўлланилган. Оқибатда улар оғир тан жароҳатлари олиб, воқеа жойида ҳалок бўлган.
31 август куни марҳумларнинг қариндошлари уларни таниб олиш учун Ўзбекистонга етиб борган. Кейинчалик жасадлар суд-тиббий экспертизадан ўтказиш мақсадида Қирғизистон томонига топширилган. Шунингдек, воқеа жойидан топилган мол-мулк, жумладан учта от ва чодир ҳам Қирғизистон томонига қайтарилиши билдирилган.
Қирғизистон Миллий хавфсизлик давлат қўмитаси ушбу ҳодиса юзасидан расмий текширув ўтказилишини ва жараён Ўзбекистон билан ҳамкорликда олиб борилишини маълум қилди. Текширув натижалари жамоатчиликка эълон қилиниши режалаштирилган.
