Қорақалпоғистонда ота фарзандлари учун 100 млн сўм алиментни олдиндан тўлади
Чимбойлик эркак уч фарзандининг таъминоти учун маблағни нақд шаклда тўлаб берган.
Фуқаролик ишлари бўйича Нукус туманлараро судининг ижро ҳужжатига асосан, Чимбой туманида яшовчи фуқаро Р. А. уч нафар фарзандининг вояга етгунига қадар таъминоти учун алимент тўлаш мажбурияти белгиланган эди.
Мазкур ижро ҳужжати Мажбурий ижро бюроси Чимбой туман бўлими иш юритувига қабул қилинганидан сўнг, давлат ижрочилари томонидан зарурий ижро ҳаракатлари олиб борилди.
Жараён давомида жавобгар Р. А. фарзандлари вояга етгунига қадар тўланиши лозим бўлган алимент пулларини олдиндан тўлаш истагини билдирган. Ҳисоб-китобларга кўра, умумий сумма 100 миллион сўмни ташкил этган.
Жавобгар ушбу маблағни шу жойнинг ўзида собиқ турмуш ўртоғига нақд шаклда топширган.
