Сурия 14 йилдан кейин илк бор нефть экспорт қилди

Сурия 14 йиллик танаффусдан сўнг илк марта расмий нефть экспортини амалга оширди. Tartus портидан 600 минг баррель хом нефть Nissos Christiana танкерига юкланиб, халқаро савдо компанияси B Serve Energy'га жўнатилди. Расмийлар бу жўнатмани мамлакатнинг энергетика инфратузилмасини синовдан ўтказувчи муҳим жараён сифатида баҳоламоқда.

 

Энергетика вазирлиги вакили Риёд ал-Жубасининг маълум қилишича, бу экспорт мамлакат ички эҳтиёжларидан ошиб кетган нефть ҳисобидан амалга оширилган. Нефтнинг асосий қисми Суриянинг бир нечта конларидан қазиб олиниб, Банияс ва Ҳомс заводларида қайта ишланган.

 

Сурия нефть транспорт компанияси раҳбари Маан Пашанинг таъкидлашича, экспортнинг қайта йўлга қўйилиши уруш ва санкциялар туфайли издан чиққан соҳада муҳим бурилиш бўлиши мумкин. Унинг айтишича, бу жўнатма транспорт ва порт инфратузилмасининг қай даражада ишлашини аниқлашга ҳам хизмат қилади.

 

2011 йилга қадар Сурия кунига ўртача 380 минг баррель нефть экспорт қилган. Аммо фуқаролар уруши ва халқаро санкциялар натижасида соҳа издан чиқиб, экспорт деярли тўхтаб қолган эди.