Бухорода 13 млрд сўмлик мол-мулк солиғи бекор қилинди
Текширувлар давомида ҳисобланган солиқ миқдори қонунга зид экани аниқланган.
Бухоро шаҳрида фаолият юритаётган "Келажак" МЧЖ (номи ўзгартирилган) солиқ текширувлари юзасидан Бош прокуратура ҳузуридаги Бизнес-омбудсман девонига мурожаат қилди. Текширув давомида аниқланишича, қурилиш муддати чўзилган объект учун 2023 йилга 6,4 миллиард сўм, 2024 йилга эса 6,7 миллиард сўм, жами 13,1 миллиард сўмлик мол-мулк солиғи ҳисобланган.
Аммо мурожаатни ўрганиш чоғида объектнинг фойдаланишга топширилиш муддати тегишли органлар томонидан 2026 йил декабрь ойигача узайтирилгани маълум бўлди. Бу эса ҳисобланган солиқ миқдорининг қонунга зид эканини кўрсатди.
Солиқ кодексининг 411-моддасига кўра, қурилиши ҳали тугалланмаган объектлар, агар уларнинг муддати расмий ҳужжатларда кўрсатилган бўлса ёки рухсатнома олинган санадан бошлаб 24 ой ичида тугалланмаган бўлса, мол-мулк солиғига тортилади. Мазкур ҳолатда эса қурилишнинг янги муддати тасдиқлангани сабабли объект солиқ солиш базасига киритилмайди.
Бизнес-омбудсман девони ушбу хулоса асосида "Келажак" МЧЖ зиммасига юкланган 13 миллиард 165 миллион сўмлик солиқ мажбурияти бекор қилинганини маълум қилди.
