“Довут ота” чегара постидаги чекловлар йил охиригача узайтирилди
Божхона қўмитаси чегара постида иккинчи босқич реконструкция ишлари бошланганини маълум қилган.
Қозоғистоннинг "Тажен" ва Ўзбекистоннинг “Довут ота” чегара ўтказиш пунктларида жорий йилнинг 1 февралидан қўлланилган чекловлар 2025 йил 31 декабрига қадар узайтирилди. Бу ҳақда Қорақалпоғистон Божхона бошқармаси хабар берди. Чекловлар жисмоний шахслар, енгил автомобиллар, автобуслар ҳамда оғирлиги 3,5 тоннагача бўлган юк машиналарига татбиқ этилади.
Божхона қўмитаси маълум қилишича, муддатнинг чўзилиши чегара постидаги иккинчи босқич реконструкция ишлари билан боғлиқ. Ҳозирда маъмурий бинолар капитал таъмир қилинмоқда, йўл қопламалари бетонлаштирилмоқда. Ушбу ишлар тугамагунча чегара орқали ҳаракат чекланган ҳолда қолади.
Бироқ, умумий оғирлиги 3,5 тоннадан ортиқ бўлган юк машиналарига ҳаракатланишга рухсат берилган. Шу билан бирга, жисмоний шахслар учун "Қорақалпоғистон" темирйўл ўтказиш пункти орқали «Нукус–Бейнеу» йўналишида қўшимча йўловчи поездлари қатнови йўлга қўйилган.
Маълумот учун, бу пост орқали ҳаракатланиш дастлаб февраль ойидан уч ой муддатга тўхтатилганди. Кейинчалик реконструкция ишлари чўзилиб, муддат 1 сентябргача узайтирилган, энди эса йил охиригача давом этиши маълум қилинди.
