Фирибгарликда айбланган уч нафар ўзбекистонлик Туркиядан депортация қилинди
Истанбулдаги Бош консулхона жабрланган фуқаролардан ҳуқуқни муҳофаза қилувчи органларга мурожаат қилишни сўрамоқда.
Туркия ва Ўзбекистон ички ишлар вазирликлари ҳамкорлигида ўтказилган тезкор-қидирув тадбирлари натижасида фирибгарликда айбланиб, қидирувга берилган уч нафар ўзбекистонлик қўлга олинди ва ватанга депортация қилинди. Бу ҳақда Истанбулдаги Бош консулхона хабар берди.
Маълумотга кўра, ушланганлар орасида 1982 йилда Бухоро вилоятида туғилган М.А., 1992 йилда Самарқанд вилоятида туғилган Ш.Б., ҳамда 1970 йилда Навоий вилоятида туғилган Г.М. бор. Улар Тошкентга олиб келинган.
Консулхона ушбу шахсларнинг ноқонуний фаолиятидан зарар кўрган фуқароларга Ўзбекистон Ички ишлар вазирлигига ёки Бош консулхонага мурожаат қилишни тавсия қилди.
Расмий маълумотга кўра, сўнгги пайтларда фирибгарлик билан боғлиқ мурожаатлар сони ортиб бормоқда. Консулхона ватандошларни ҳушёр бўлишга, шубҳали таклифларга ишонмасликка ва қонуний манбалардан фойдаланишга чақирди.
