Ўзбекистонда уй-жой сотиб олишда кешбэк жорий этилиши мумкин
Уй-жойларнинг фақат 10 фоизи ҚҚС билан расмий харид қилинмоқда. Қолган 90 фоизи солиқсиз сотилмоқда.
Бугунги кунда Ўзбекистонда уй-жой харид қилиш жараёнида кешбэк тизимини жорий этиш масаласи муҳокама қилинмоқда. Бу ҳақда 29 август куни Савдо-саноат палатаси томонидан қурилиш соҳаси вакиллари билан ташкил этилган очиқ мулоқот чоғида маълум қилинди.
Савдо-саноат палатаси раиси Даврон Ваҳобовнинг айтишича, ҳозирда уй-жойларнинг атиги 10 фоизи ҚҚС билан сотилмоқда, қолган 90 фоизи эса солиқсиз айланмоқда. У кешбэк механизми жорий қилинса, харидорлар ҳужжатлар асосида уй-жой харид қилиши ва бозорни янада шаффофлаштиришга ҳисса қўшишини таъкидлади.
“Жисмоний шахслар учун 4-5 фоизлик кешбэк тизимини йўлга қўйиш бўйича фикрлар бор. Бу орқали харидорлар битим суммаcининг 5-6 фоизи миқдорида кешбэк олиш учун ҳисобварақ-фактура талаб қилишга ўрганади”, — деди Ваҳобов.
Маълумотларга кўра, соҳада яширин иқтисодий фаолият ҳажми 97 трлн сўмни ташкил этмоқда. Шунингдек, яширилган солиқлар 1,2 трлн сўм, талон-торож қилинган маблағлар эса 203 млрд сўмни ташкил этиши қайд этилган.
