Наманганда фуқаро ИИБ биносида қийноққа солингани айтилмоқда

Наманган шаҳрида ички ишлар бўлими биносида фуқаро қийноққа солингани ҳақида хабар тарқалди. Инсон ҳуқуқлари бўйича "Эзгулик" жамияти раҳбари Абдураҳмон Ташанов бу ҳақда ўзининг Facebook саҳифасида маълум қилди. Унга кўра, 2025 йил 14 август куни Абдулаҳад Ўрмонов исмли фуқаро икки кун давомида ички ишлар ходимлари томонидан калтакланиб, оғир тан жароҳатлари олган.

 

Жабрланувчининг айтишича, уни уч нафар ходим ичкаридаги камера йўқ жойга олиб кириб, навбат билан полга улоқтирган, дубинка ва электрошокер билан қийнаган. “Нафасим бўғилди, ичим эзилиб кетди. Бошқа хонада ҳам қийнашди, ҳаттоки сув сўраганимда ҳам рад этишди”, — дейди у. Судда унга қўйилган “майда безорилик” айблови рад этилган.

 

Абдулаҳад Ўрмоновнинг онаси Осиё Бўтабоева ҳам фарзандининг узоқ вақтдан бери маҳалладаги профилактика инспектори билан келишмовчиликлари бўлганини айтмоқда. “Ўғлим соғлом эди, бир кунда ногирон қилиб қўйишди. Қовурғалари цинган, жигари ва ошқозон ости бези эзилган, ўпкаси тешилган, қора талоғи олиб ташланган”, — дейди у.

 

Мазкур ҳолат бўйича дастлаб ички ишлар бўлими тергов бошлаган, кейинроқ эса иш Наманган шаҳар прокуратурасига ўтказилган. Бош прокуратура ва ИИВ матбуот хизмати ҳолат юзасидан ҳозирча расмий изоҳ бермади.