Ўзбекистон ва Хитой геология бўйича 13 та янги лойиҳани бошлайди
5 млрд долларлик ҳамкорлик келишуви энергетика хомашёси ва стратегик минералларни қамраб олади.
Ўзбекистон ва Хитой ўртасида энергетика хомашёси, кўмир, уран ҳамда критик минераллар бўйича йирик ҳамкорлик лойиҳалари портфели шакллантирилди. Расмий маълумотларга кўра, томонлар умумий қиймати қарийб 5 миллиард доллар бўлган 13 та янги инвестицион лойиҳани амалга оширишга келишиб олди.
Тоғ-кон саноати ва геология вазири Бобир Исломов “Ўзбекистон 24” телеканалига берган интервьюсида, Хитой билан ҳамкорлик янги истиқболлар очишини таъкидлади: “Бу ташриф бизга янги йўналишларни ривожлантириш ва замонавий технологияларни жалб қилиш имконини беради”, — деди у.
Маълум қилинишича, 2 сентябрь куни Пекинда Ўзбекистон президенти Шавкат Мирзиёев ва Хитой раиси Си Сзинпин ўртасида расмий учрашув бўлиб ўтди. Музокараларда энергетика, геология, қишлоқ хўжалиги, кимё, транспорт ва туризм соҳаларида ҳамкорлик лойиҳаларини амалга ошириш масалалари муҳокама қилинди.
Аввал хабар қилингандек, Ўзбекистон ва Хитойнинг China National Nuclear Corporation (CNNC) компанияси ўртасида уран саноатида стратегик ҳамкорлик йўлга қўйилган бўлиб, ҳозирда кичик модулли ядровий реакторларни жорий этиш, уран қазиб олиш ва уни қайта ишлаш лойиҳалари устида ишлар давом этмоқда.
