Тошкент вилоятида чумчуқ гўштидан кабоб тайёрлаган чойхона раҳбари жаримага тортилди
Янгийўлда ноқонуний ов ҳолати учун 4,12 млн сўм жарима белгиланди.
Ижтимоий тармоқларда Тошкент вилоятининг Янгийўл туманида жойлашган чойхоналардан бирида чумчуқ гўштидан кабоб тайёрланаётгани акс этган видео тарқалди. Вилоят экология бошқармаси ҳолат юзасидан расмий баёнот берди.
Текширув давомида ҳозирда ушбу чойхонада чумчуқ гўштидан кабоб тайёрланмаётгани аниқланган. Давлат инспекторлари чойхона раҳбаридан изоҳ олганида, у мазкур видеолавҳа илгари, мижозлар сонини ошириш мақсадида олинганини ва ҳозирда бундай ҳолатга йўл қўйилмаётганини маълум қилган.
Мутасаддилар раҳбарни келгусида бундай қонунбузарликни такрорламаслик бўйича огоҳлантирди. Шунингдек, унга нисбатан Маъмурий жавобгарлик тўғрисидаги кодекснинг 63-моддаси 1-қисми (“Ноқонуний ов”) бўйича маъмурий баённома расмийлаштирилди.
Натижада чойхона раҳбарига 4 миллион 120 минг сўм миқдорида жарима қўлланилди. Экология бошқармаси эса бу каби ҳолатлар такрорланмаслиги учун мунтазам назорат олиб борилишини билдирди.
