Туркия ва Болгарияда ҳалок бўлган 6 нафар ўзбекистонликнинг жасади ватанга олиб келинди
Консулхона жасадларни қайтаришда, шунингдек, қарзга ботган ва ҳужжатсиз қолган ватандошларни қўллаб-қувватлашда ёрдам берган.
Болгариянинг Созопол шаҳрида чўкиб кетган 22 ёшли ўзбекистонлик талабанинг жасади, шунингдек, Туркияда турли сабабларга кўра вафот этган яна беш нафар ватандошнинг жасади Ўзбекистонга олиб келинди. Бу ҳақда Ўзбекистоннинг Истанбулдаги Бош консулхонаси маълум қилди.
Дипломатик ваколатхона хабарига кўра, жасадларни ватанга қайтариш билан бир қаторда, Туркияда даволаниш чоғида катта қарзга ботиб қолган 12 нафар ватандошга ҳам ёрдам кўрсатилди. Шифохоналардаги қарзлари бўйича чегирмалар берилди, уларнинг соғлиги тикланганидан сўнг уйларига қайтишларига ёрдам берилди.
Бундан ташқари, ҳужжатсиз қолиб кетган 27 нафар ўзбекистонликнинг ҳам ҳужжатлари расмийлаштирилиб, юртга қайтишлари таъминланди.
Эслатиб ўтамиз, 7 август куни Болгариянинг Созопол шаҳрида 22 ёшли талаба дўстлари билан чўмилишга борганда, кучли оқимга тушиб кетиб, чўкиб кетгани ҳақида хабар берилганди. Икки кун давом этган қидирув ишлари 9 август куни якун топди. Унинг жасади сув остидаги йирик қоя оралиғидан топилди. Қутқарув хизмати жасадни топа олмаган бўлсада, талабанинг ўзбек, қирғиз ва молдовалик дўстлари қарийб тўққиз соат давомида излаб, уни қоя остидан олиб чиқишга муваффақ бўлишди.
