Ўзбекистон ва Мўғулистон геология соҳасида стратегик ҳамкорликни мустаҳкамлади

Мўғулистон – дунёда фойдали қазилмалар захиралари бўйича етакчи давлатлардан бири. Бу мамлакат геология ва кончилик бўйича катта тажрибага эга. Ўзбекистон эса ўз илмий мактаби ва кадрлар салоҳияти билан ажралиб туради. Уларининг бирлашуви икки томон учун ҳам фойдали натижалар келтиради.

 

Шу мақсадда Ўзбекистон томонидан Геология фанлари университети проректори Л.Шарафутдинова, “Uzbek Overseas Geology Company” бош директори Х. Омонoв Мўғулистоннинг Фан ва Технологиялари Университети Геология институти раҳбарияти билан учрашиб, кадрлар тайёрлаш, илмий лойиҳалар ва академик алмашинув бўйича янги дастурларни муҳокама қилди.

 

Учрашувда геология соҳасида кадрлар тайёрлаш, амалиёт ва илмий тажриба алмашиш масалалари юзасидан атрофлича фикр алмашдилар. Томонлар стратегик ҳамкорлик истиқболларини муҳокама қилар экан, илмий-таълим жараёнларини халқаро стандартлар асосида ташкил этиш, талабалар ҳамда профессор-ўқитувчилар учун академик алмашинув дастурларини йўлга қўйиш, қўшма илмий лойиҳаларни амалга ошириш бўйича англашув меморандуми имзоланди.

 

Ўзбекистон Республикаси Президентининг Мўғулистонга давлат ташрифи давомида геология ва тоғ-кон саноати йўналишида муҳим келишувларга эришилган эди. Ушбу келишувлар доирасида фойдали қазилмаларни излаш, қазиб олиш ва қайта ишлаш, кадрлар малакасини ошириш ва қўшма таълим дастурларини амалга ошириш бўйича ҳамкорлик йўлга қўйилди.

 

Бу ҳамкорлик Ўзбекистон ва Мўғулистон геологлари ўртасида тажриба алмашиш, талабалар ва ёш мутахассислар учун қўшма грантлар ҳамда амалиёт дастурлари, илмий тадқиқотларни халқаро даражада биргаликда олиб боришни, иккала мамлакат тоғ-кон салоҳиятидан самарали фойдаланишни беради.