Ўзбекистонда шахсий автомобилларни олиб кириш тартиби соддалаштирилди

Президент Администрацияси топшириғига асосан, шахсий ва хизмат эҳтиёжлари учун олиб кириладиган транспорт воситаларининг мувофиқлигини баҳолаш тартиб-таомиллари соддалаштирилди.

 

Идоралараро комиссия қарорига кўра:

 

Юридик шахслар учун автомобил турини маъқуллаш ҳужжати амал қилиш муддати 3 йилдан 5 йилгача узайтирилди;

 

Жисмоний шахслар томонидан шахсий эҳтиёж учун олиб кириладиган бир дона автомобилни Пискент полигонида мажбурий синовдан ўтказиш талаби бекор қилинди.

 

Статистик маълумотларга кўра, 2020 йилда мамлакатда расман фақат 3 та дилерлик маркази фаолият юритган бўлса, бугунги кунда уларнинг сони 21 тага етди.

 

Турини маъқуллаган автомобил моделлари сони сўнгги йилларда 15 тадан 101 тага ошди.

 

2024 йилнинг биринчи ярим йиллигида жисмоний шахслар томонидан олиб кирилган автомобиллар сони ўтган йилга нисбатан 2 693 тага кўпайди.

 

Мутахассисларнинг қайд этишича, 2024 йил 1 ноябрдан бошлаб транспорт воситалари мувофиқлиги бўйича айрим мажбурий кўрсаткичларни Пискент полигонида синовдан ўтказиш йўлга қўйилган эди. Бироқ мавжуд инфратузилманинг етарли эмаслиги сабабли навбатлар 1 ойдан 3 ойгача чўзилиб кетди ва аҳолининг эътирозлари кучайди. Шу боис тизимни янада қулайлаштириш чоралари кўрилди.

 

Мазкур ўзгаришлар автомобилларнинг хавфсизлик талабларига риоя этилишини таъминлаш, истеъмолчилар ҳуқуқларини ҳимоя қилиш, маҳаллий ишлаб чиқарувчилар фаолиятини қўллаб-қувватлаш ва автомобил бозорида соғлом рақобатни ривожлантиришга қаратилган.