Темир йўл ва метрода қоидабузарликлар учун жарима жорий этилади
Сенаторлар транспорт хавфсизлигини мустаҳкамлашга қаратилган қонунни маъқуллади.
Сенаторлар томонидан маъқулланган янги қонунга кўра, темир йўл ва метрода йўловчи ташиш қоидаларини бузган мансабдор шахсларга жарима жорий этилади. Эндиликда бундай ҳолатлар учун улар БҲМнинг 10 баравари миқдорида жарима тўлашлари белгиланган.
Шунингдек, халқаро ва шаҳарлараро автомобиль ташувларида ҳайдовчиларнинг меҳнат ва дам олиш тартибини бузиши ҳам алоҳида назоратга олинади. Қоидабузарлик аниқланса, ҳайдовчилар 7 баравар БҲМ миқдорида жаримага тортилади.
Мазкур чоралар транспорт хавфсизлигини ошириш, йўловчилар ҳаётини ҳимоя қилиш ва интизомни кучайтиришга қаратилган. Сенаторларнинг фикрича, қатъий жавобгарлик тизими соҳада тартибни мустаҳкамлашга хизмат қилади.
Қонуннинг кучга кириши натижасида нафақат йўловчилар хавфсизлиги таъминланиши, балки транспорт хизматлари сифатига бўлган ишонч ҳам ортиши кутилмоқда. Шу тариқа, ташувчилар ва ҳайдовчилар масъулияти янада оширилади.
