Андижонда Қирғизистондан наркотик олиб киришга уринган гуруҳ қўлга олинди
Қирғизистондан олиб кирилган гиёҳванд моддалар яширин жойдан топилди.
Андижон вилоятида ҳуқуқни муҳофаза қилувчи органлар томонидан йирик миқдордаги гиёҳванд моддаларни киритиш билан шуғулланган жиноий гуруҳ фош этилди. Бу ҳақда ДХХ Zamon.uz га хабар қилди.
Тергов маълумотларига кўра, Қўрғонтепа туманида яшовчи 6 нафар фуқаро (34–41 ёшда) Қирғизистон ҳудудидан гашиш олиб киришга келишиб, хорижлик сотувчидан 15 минг АҚШ долларига икки килограмм наркотик восита сотиб олишни режалаштирган. Гиёҳванд моддалар чегара орқали яширин равишда олиб кирилиб, Хонобод шаҳридаги махфий жойда сақланган.
Ўтказилган тезкор тадбир давомида омонатни етказиб бераётган курьер ушланган, кейинчалик гуруҳнинг қолган аъзолари ҳам қўлга олинган. Экспертиза хулосасига кўра, мусодара қилинган гашишнинг соф оғирлиги қарийб 1,9 килограммни ташкил этган.
Ҳолат юзасидан Жиноят кодексининг 246-2-моддаси (контрабанда), 25-моддаси (жиноятга тайёргарлик кўриш ва унга суиқасд) ҳамда 273-моддаси (гиёҳвандлик воситалари билан ноқонуний муомала) бўйича жиноят иши қўзғатилди. Айбланувчилар қамоққа олинган бўлиб, уларга 10 йилдан 20 йилгача озодликдан маҳрум этиш жазоси тайинланиши мумкин.
