Фарғонада боғчада 13 нафар бола заҳарланиш аломатлари билан касалхонага ётқизилди
Ҳодиса юз берган мактабгача таълим муассасаси фаолияти вақтинча тўхтатилди.
Жорий йилнинг 22 август куни Фарғона вилояти Олтиариқ туманинг Қизилтепа қишлоғида жойлашган 7 сонли давлат мактабгача таълим ташкилотида болалар овқатдан заҳарланиш аломатлари билан шифохонага ётқизилган.
Дастлабки маълумотларга кўра, мазкур муассасада тарбияланаётган 13 нафар бола шифокорлар кўригидан ўтказилган ва уларнинг соғлиғига зарурий тиббий ёрдам кўрсатилаётгани маълум қилинган.
Воқеа ортидан мактабгача таълим ташкилоти фаолияти вақтинча тўхтатилди. Соғлиқни сақлаш вазирлиги, Санитария-эпидемиология хизмати ҳамда бошқа тегишли назорат органлари томонидан ҳодиса сабабларини аниқлаш, шунингдек, келгусида бундай ҳолатларнинг олдини олиш мақсадида кенг қамровли текширув ишлари олиб борилмоқда.
Масъул идоралар текширув натижаларига кўра қонун доирасида тегишли чоралар кўрилиши ҳамда жамоатчиликка қўшимча маълумот берилишини маълум қилмоқда.
