Россияда содир бўлган ЙТҲда уч нафар ўзбекистонлик йигит ҳалок бўлди
Татаристондаги Зайинск туманида Nexia автомобили қарама-қарши йўлга чиқиб кетиб, MAN юк машинаси билан тўқнашиб кетган.
5 сентябрь куни Татаристоннинг Зайинск туманида оғир йўл-транспорт ҳодисаси юз берди. Маълумотларга кўра, Nexia автомобили номаълум сабабга кўра қарама-қарши йўлга чиқиб кетиб, MAN юк машинаси билан тўқнашган.
Зарб шу қадар кучли бўлганки, енгил автомобиль бутунлай эзилиб кетган. Оқибатда ҳайдовчи ва икки нафар йўловчи воқеа жойида ҳалок бўлган.
Татаристон прокуратураси ҳодиса Набережний Челны–Олметевск йўлининг 38-километрида содир бўлганини тасдиқлади. Ҳозирда тергов ишлари олиб борилмоқда, прокуратура эса жараённи ўз назоратига олган.
Ўзбекистоннинг Қозондаги Бош консулхонаси марҳумларнинг барчаси Ўзбекистон фуқаролари эканини маълум қилди. Консулхона вакилларининг билдиришича, барча зарур ҳуқуқий жараёнлар якунлангач, жасадлар Миграция агентлиги ҳисобидан ватанга олиб келинади.
Ҳалок бўлганларнинг ёши мос равишда 35, 33 ва 30 ёшда бўлиб, уларнинг барчаси Наманган вилоятидан экани айтилмоқда.
