Ангренда йирик ЙТҲ: қурбонлар борлиги маълум қилинди

7 сентябрь куни соат 12:20 атрофида Тошкент вилояти ҳудудидан ўтувчи А-373 Тошкент—Ўш халқаро автомобил йўлида бир нечта юк ва енгил автомобиллар иштирокида йирик йўл-транспорт ҳодисаси содир бўлди. Ҳодиса акс этган видеолавҳалар ижтимоий тармоқларда кенг тарқалди.

 

Дастлабки маълумотларга кўра, ЙТҲда нефть маҳсулотлари ортилган махсус юк автомобили, цемент ташийдиган юк машинаси ҳамда бир нечта енгил автомобиллар тўқнашган. Тўқнашув натижасида ёнғин келиб чиққан, айрим транспорт воситалари бутунлай ёниб кетган. Видеоларда йўл четида ҳалок бўлганлар жасадлари ҳам кўринган.

 

Расмий тасдиқланмаган манбаларда қурбонлар сони 10 кишидан ортиқ экани айтилмоқда. Ҳозирча бу маълумотга расмий идоралар томонидан аниқлик киритилмади.

 

Тошкент вилояти ИИББ матбуот хизмати ҳолат юзасидан Ўзбекистон Республикаси Жиноят кодексининг 266-моддаси 3-қисми (транспорт воситалари ҳаракати ёки улардан фойдаланиш қоидаларини бузиш одамлар ўлишига сабаб бўлиши) билан жиноят иши қўзғатилганини маълум қилди. Тергов-суриштирув ишлари олиб борилмоқда ва ҳодиса тўлиқ назоратга олингани қайд этилди.

 

Мазкур ЙТҲ оқибатида Тошкент—Оҳангарон—Ангрен—Қўқон—Шаҳрихон—Андижон автомобил йўлининг 93–94-километрлар оралиғида икки томонлама тирбандлик юзага келди. “Қамчиқавтойўл” корхонаси маълумотига кўра, ҳаракатни тиклаш ва хавфсизликни таъминлаш бўйича тегишли хизматлар ҳозирда иш олиб бормоқда.