Тошкентда бегона аёлни ҳимоя қилмоқчи бўлган эркак калтакланиб оғир аҳволга тушди

Ижтимоий тармоқларда бир фуқаро бошқа фуқаро томонидан тан жароҳати олиб йиқилиб тушганлиги акс этган видео тарқалиб, кенг муҳокамаларга сабаб бўлди.

 

Мазкур ҳолат юзасидан ўтказилган текширувларга кўра, жорий йил 16 март куни тунги соат 02:30 ларда Яккасарой туманидаги ресторанлардан бирида мижоз сифатида келган 1995 йилда туғилган А.Ш. ўзининг таниши, 1985 йилда туғилган Х.А. билан келиб чиққан низо сабабли ўзаро жанжаллашган. Шу вақтда 1990 йилда туғилган Б.А. уларни ажратишга уринганида, А.Ш. унга тан жароҳати етказган.

 

Натижада Б.А. "бош мия жароҳати, ўнг юзидан лунжи йиртилган жароҳати ва спиртдан заҳарланиш" ташхиси билан шифохонага ётқизилган.

 

Мазкур ҳолат юзасидан Яккасарой тумани ИИО ФМБ Тергов бўлими томонидан Ўзбекистон Республикаси Жиноят кодексининг 277-моддаси (“Безорилик”) билан жиноят иши қўзғатилиб, тергов ҳаракатлари бошланган.

 

Ҳозирда А.Ш.га нисбатан:

 

ЖКнинг 104-моддаси 2-қисми “е” банди (қасддан оғир тан жароҳати етказиш),

 

ЖКнинг 168-моддаси 3-қисми “а”, “г” бандлари ҳамда 4-қисми “а” банди (фирибгарлик),

 

ЖКнинг 277-моддаси 3-қисми “г” банди (безорилик) билан айблов қўйилган бўлиб, жиноят иши Жиноят ишлари бўйича Мирзо Улуғбек туман судида кўриб чиқилмоқда.

 

2025 йил 4 сентябр куни бўлиб ўтган суд мажлисида судланувчининг адвокатлари томонидан, суд жараёнида шахсий ва оилавий ҳаётга оид маълумотлар ошкор бўлиши мумкинлиги, оила аъзоларининг хавфсизлигини таъминлаш ҳамда айбсизлик презумпциясини инобатга олиб, суд мажлисини ёпиқ тарзда ўтказиш тўғрисида илтимоснома киритилди. Мазкур илтимоснома суд томонидан қаноатлантирилиб, суд мажлиси ёпиқ тарзда ўтказилиши белгиланди.

 

Иш якунлари бўйича адолатли ва қонуний суд қарори чиқарилиши таъминланади. Ушбу жараён жамоатчилик эътиборида бўлгани сабабли суд қарори натижалари ҳақида қўшимча ахборот оммавий ахборот воситаларига тақдим этилади.