Самарқандда 100 йиллик чинорлар кесиб ташлангани айтилмоқда
Ижтимоий тармоқларда эътирозларга сабаб бўлган ҳолат юзасидан Самарқанд вилояти ҳокимлиги расмий муносабат билдирди.
Сўнгги кунларда ижтимоий тармоқларда Самарқанд шаҳридаги Булвар ҳудудида қадимий, юз йиллик чинорлар кесилаётгани ҳақида хабарлар тарқалиб, бу ҳолат жамоатчиликда катта мунозараларга сабаб бўлди. Аҳоли дарахтлар шаҳар манзарасининг ажралмас қисми эканини таъкидлаб, уларнинг кесилишига норозилик билдирди.
Мазкур вазият юзасидан Самарқанд вилояти ҳокимлиги ахборот хизмати расмий изоҳ берди. Унга кўра, 7 сентябрь куни Амир Темур мақбараси яқинида жойлашган уч туп чинор дарахти ташқи таъсирлар оқибатида чириб, танасида ғоваклар пайдо бўлгани, йўл томонга хавфли даражада оғиб қолганлиги аниқланган. Шу боис улар инсонлар ҳаёти ва мол-мулкига хавф туғдириши сабабли кесилган.
Мутасадди ташкилотлар – Экология бошқармаси, Фавқулодда вазиятлар бошқармаси ҳамда Ўсимликлар карантини ходимларидан иборат ишчи гуруҳ томонидан ўрганиш ўтказилиб, дарахтларнинг мустаҳкамлиги бутунлай йўқотилгани ҳақида хулоса берилган.
Ҳокимлик маълумотига кўра, кесилган чинорларнинг ўрнига ёш, лекин қиммат навли кўчатлар экилади. Бу ишни амалга ошириш шаҳар ободонлаштириш бошқармасига топширилган.
