Ўзбекистонда Касбий таълим агентлиги ташкил қилинади
Техникумларни ривожлантириш ва ёшларни касб-ҳунарга жалб этиш мақсадида янги агентлик фаолияти йўлга қўйилади.
Президент Шавкат Мирзиёев раислигида ўтаётган йиғилишда бу йил 9-синфни 608 минг ўқувчи битирган бўлса, уларнинг атиги 182 минг нафари техникумларга бораётгани танқид қилинди. “Бизда 450 минг ўқувчини қабул қила оладиган 598 та техникум бор. Бу ёшлар учун жуда катта ресурс, шароит ва имконият. Лекин бу йил 9-синфни 608 минг ўқувчи битирган бўлса, уларни атиги 182 минг нафари техникумларга боряпти. Бугундан бошлаб бир йил ёшларни касб-ҳунарга ўргатиш йили бўлади,” деди президент.
Мутасаддилар зиммасига вилоят ва туман ҳокимлари билан биргаликда Президент ва ихтисослашган мактабда орттирилган тажриба асосида жорий йилда 598 та техникумга халқаро стандарт бўйича замонавий касбга ўқитиш муҳитини яратиш вазифаси қўйилди.
Умуман, вилоят ва туман ҳокимларига келгуси ўқув йилида 9-синф битирувчиларининг камида 50 фоизини, ҳозиргига қўшимча яна 200 минг ўқувчини техникумга қамраб олиш топширилди.
