Ўзбекистонда мактаб автобуслари тизими йўлга қўйилади
Қашқадарё ва Сурхондарёда дастлабки йўналишлар ишга туширилди.
Ўзбекистон ҳудудларида мактаб автобуслари тизими босқичма-босқич жорий этилиши режалаштирилмоқда. Ушбу тизим чекка ва етиб бориш қийин бўлган ҳудудларда истиқомат қилувчи болаларнинг таълим муассасаларига қулай ва хавфсиз етиб боришини таъминлашга хизмат қилади.
Бугунги таълим соҳасига бағишланган йиғилишда қайд этилишича, мамлакатимизда ҳануз 74 минг нафар ўқувчи мактабга қатнаш учун ҳар куни 5–7 километр масофани пиёда босиб ўтмоқда. Бу эса ўқувчиларнинг саломатлиги, кайфияти ва ўзлаштиришига салбий таъсир кўрсатмоқда.
Амалиёт ишлари аллақачон бошланиб, Қашқадарё ва Сурхондарё вилоятларида маҳаллий бюджет маблағлари ҳисобига 100 та мактаб учун бепул автобус йўналишлари ташкил қилинди. Самарқанд ва Жиззах вилоятлари ҳам мазкур ташаббусни қўллаб-қувватлаб, бир ой ичида 100 та мактаб ўқувчиларини автобус орқали ташишни йўлга қўйишни режалаштирмоқда.
Давлат раҳбари йиғилишда бу тажрибани бошқа ҳудудларга ҳам татбиқ этиш зарурлигини таъкидлади. Мактаб автобусларининг босқичма-босқич жорий этилиши минглаб болаларнинг мактабга ўз вақтида ва хавфсиз етиб боришини таъминлайди, таълим сифати ва қамровини янада оширишга ёрдам беради.
