Вазирлик ходими жинсий алоқа эвазига директорлик лавозимини таклиф қилди
Ҳозирда у эгаллаб турган лавозимидан озод қилинган.
Ижтимоий тармоқларда Мактабгача ва мактаб таълими вазирлиги масъул ходими қизларга менежерлик сертификатини олиш ва мактаб директори сифатида ишга жойлашишда ёрдам бериш эвазига у билан жинсий алоқа қилишни таклиф қилгани акс этган аудио тарқалди. Вазирлик матбуот котиби Дилфуза Собирова аудиўдаги овоз ростдан ҳам вазирлик ходимига тегишли эканини тасдиқлади.
Маълум қилинишича, ушбу вазият иштирокчиси бўлган вазирлик ходими лавозимидан озод этилган. “Вазирлик соҳага доир коррупцион ҳолатлар ҳамда манфаатлар тўқнашувига мутлақо қарши. Тизимда меҳнат қилаётган барча ходимларнинг касбий одоб-ахлоқ қоидаларига қатъий риоя этиши керак,” дейди Дилфуза Собирова.
Шунингдек, ноқонуний вазиятларга йўл қўйган ходимларга нисбатан қонунчиликда белгиланган тартибда қатъий чоралар кўрилиши таъминланади. Вазирлик бу борада барча ходимларга огоҳлик берилганини ва келажакда шундай ҳолатларнинг олди олиниши таъкидланди.
