Ўзбекистонда ҳарбий ва идоравий формага ўхшаш кийим кийиш тақиқланади
Форма нусхаларини ишлаб чиқариш ва улардан фойдаланиш ҳам ноқонуний деб белгиланади.
Ўзбекистонда ҳарбий ёки давлат идоралари формаларига ўхшаш кийим-бошни жорий этиш ва ундан фойдаланишга нисбатан жавобгарлик белгиланмоқда. Бу ҳақда Норматив-ҳуқуқий ҳужжатлар лойиҳалари муҳокамаси порталида жойлаштирилган қонун лойиҳасида маълум қилинди.
Бош прокуратура томонидан ишлаб чиқилган ташаббусга кўра, хизмат кийимини қонунга хилоф равишда кийиш ҳолатларига барҳам бериш мақсад қилинган. Мазкур нормалар Маъмурий жавобгарлик тўғрисидаги кодекснинг 209¹-моддасига қўшимчалар киритиш орқали жорий этилиши кутилмоқда.
Қонун лойиҳасида белгиланишича, ҳарбий ёки идоравий форма элементлари бўлган кийимларни рухсатсиз кийган шахслар жаримага тортилади, кийим эса мусодара қилинади. Жарима миқдори БҲМнинг икки бараваридан беш бараваригача етиши мумкин.
Шунингдек, мато ранги, тикилиш услуби ёки рамзлари жиҳатидан ҳарбий ва идоравий формага ўхшаш кийимларни ишлаб чиқариш ва улардан фойдаланиш ҳам ноқонуний ҳисобланади. Бундай ҳуқуқбузарлик содир этилган тақдирда кийим мусодара қилиниб, БҲМнинг беш бараваридан ўн бараваригача жарима қўлланади.
Мазкур ҳужжат ҳозирда жамоатчилик муҳокамасига қўйилган.
