Қирғизистондан ноқонуний олиб келинган тилла буюмлари ушлаб қолинди
ДХХ фош этилган воқеа бўйича Zamon.uz’ни хабардор қилди.
Давлат хавфсизлик хизмати Фарғона вилояти бошқармаси ходимлари томонидан божхона органлари билан ҳамкорликда ўтказилган тезкор тадбир давомида катта миқдордаги заргарлик буюмлари контрабандасига чек қўйилди.
Аниқланишича, Фарғона туманида яшовчи фуқаро (1987 й.т.) қирғизистонлик шахс томонидан айланма йўллар орқали давлат чегарасидан ноқонуний олиб кирилган қимматбаҳо буюмларни қабул қилиб олган. У мазкур заргарлик маҳсулотларини моддий манфаат эвазига Фарғона шаҳрида уни кутиб турган Андижон вилояти, Жалақудуқ туманида яшовчи (1997 й.т.) бошқа бир шахсга топширётган вақтида қўлга олинган.
Олиб қўйилган тилла буюмларнинг умумий оғирлиги 5 килограмм 706 граммни ташкил этиб, дастлабки баҳолашга кўра, қиймати 5 миллиард 746 миллион сўмга тенг.
Ҳозирда мазкур ҳолат юзасидан терговга қадар текширув ишлари олиб борилмоқда.
