Қорақалпоғистон ва Қашқадарёда тиббиёт ходимлари пора билан ушланди
Фирибгарлар ишга жойлаштиришни ваъда қилиб, фуқаролардан пул талаб қилган.
Бош прокуратура ҳузуридаги Департамент матбуот хизмати хабарига кўра, ишга жойлаштириш баҳонасида фуқаролардан пул талаб қилиб, фирибгарлик ва коррупция билан шуғулланган шахслар фош этилди.
Қорақалпоғистон Республикасида ўтказилган махсус тезкор тадбир давомида Республика шошилинч тиббий ёрдам илмий маркази Қорақалпоғистон бўлими ходими қўлга олинди. У фуқарони ишга жойлаштириш эвазига 32 миллион сўм олаётганида ушланди.
Худди шундай, Қашқадарё вилоятида Қарши туман тиббиёт бирлашмаси кадрлар бўлими ходими ҳам ички ишлар органлари ва Департамент ходимлари томонидан қўлга олинди. У фуқаро марказий поликлиникага ишга жойлаштирилишини ваъда қилиб, 1000 АҚШ долларини олаётган пайтда ушланган.
Ҳар икки ҳолат юзасидан жиноят ишлари қўзғатилиб, тергов ҳаракатлари олиб борилмоқда.
