“Саҳна – менинг ҳаётим”: Баҳодир Йўлдошев таваллудининг 80 йиллиги нишонланди
Ўзбекистон халқ артисти, машҳур режиссёр ва педагог Баҳодир Йўлдошев таваллудининг 80 йиллигига бағишланган “Саҳна – менинг ҳаётим” номли адабий-маърифий хотира кечаси бўлиб ўтди.
Хотира кечасида ёд этилди
Тадбирда Ўзбекистон Республикаси Президентнинг маслаҳатчиси Хайриддин Султонов, Маданият вазири Озодбек Назарбеков, санъат ва маданият арбоблари, шогирдлари, шоир ва ёзувчилар, талабалар ҳамда ОАВ вакиллари иштирок этди.
Миллий театр равнақига қўшган улкан ҳисса
Баҳодир Йўлдошев нафақат спектакллар саҳналаштирган, балки ўзбек театрини янги босқичга олиб чиққан, ёш авлодни тарбиялаш ва миллий маданиятни тарғиб этишга катта ҳисса қўшган санъаткор сифатида ёдга олинди. Унинг ижодий йўли миллий драматургияни бойитишда, замонавий театр услубини шакллантиришда алоҳида ўрин тутгани таъкидланди.
Маданият вазири Озодбек Назарбеков ўз нутқида шундай деди:
“Баҳодир Йўлдошев фақат катта театр саҳналаридагина эмас, балки ёш ижодкорлар билан ҳам фаол ишлади. Унинг “Дийдор” театр-студияси фаолияти кўплаб ёшларни театр санъатига касбий тайёрлашда беқиёс аҳамият касб этди. Мустақилликнинг 34 йиллиги муносабати билан муҳтарам Президентимиз уни “Дўстлик” ордени билан тақдирладилар”.
Тадбир давомида
Кечада “Ўзбекфильм” студияси томонидан суратга олинган ҳужжатли фильм ва Баҳодир Йўлдошев ижодига оид машҳур асарлардан парчалар намойиш қилинди. Жумладан, “Келинлар қўзғолони”, “Искандар”, “Нодирабегим” спектакллари, “Оловли йўллар” фильми ҳамда “Дийдор” театр-студиясининг “Аршин мал алан” спектаклидан лавҳалар меҳмонларга тақдим этилди.
