Совуқ қуролни ноқонуний олиб юрган шахсларга нисбатан жавобгарлик кучаяди

Олий Мажлис Қонунчилик палатасида жамоат хавфсизлигини мустаҳкамлаш ва фуқаролар осойишталигини таъминлашга қаратилган янги қонун лойиҳаси кўриб чиқилди.

 

Такидланишича, сўнгги йилларда совуқ қуролларни ноқонуний равишда жамоат жойларида олиб юриш ҳолатлари кўпайган. Бу эса аҳолининг ҳаёти ва соғлиги учун хавф туғдираётган омиллардан бири сифатида қайд этилди.

 

Лойиҳа доирасида бир қатор янги тартиблар белгиланмоқда. Хусусан, оилавий зўравонлик ёки болаларга нисбатан тажовуз қилган шахсларга қурол олиш ҳуқуқи берилмайди. Бундай ҳуқуқбузарлик содир этганларнинг мавжуд қуроллари ички ишлар органлари томонидан вақтинча олиб қўйилиши мумкин.

 

Шунингдек, қонун лойиҳасида спиртли ичимлик ёки наркотик моддаларга қарамлик муаммосига дуч келган шахсларни мажбурий даволаш тартиблари ҳам мустаҳкамлаб қўйилган. Эндиликда ҳатто бир марта маъмурий жавобгарликка тортилган фуқаро ҳам суд қарорига асосан даволаш муассасасига юборилиши мумкин бўлади.

 

Мутасаддиларнинг қайд этишича, мазкур ўзгаришлар ҳуқуқбузарликларнинг олдини олиш, маҳаллаларда барқарор муҳитни таъминлаш ва ҳар бир фуқаронинг ҳаёти ҳамда хавфсизлигини самарали ҳимоя қилишга қаратилган.

 

Қонун лойиҳаси биринчи ўқишда маъқулланиб, эндиликда қонунчилик жараёнининг кейинги босқичларида кўриб чиқилиши кутилмоқда.