Тошкент шаҳрида атмосфера ҳавосини муҳофаза қилиш чоралари кучайтирилмоқда

Жорий йилнинг январь–август ойларида Тошкент шаҳри ҳавосини соғломлаштириш ва ифлосланиш манбаларини бартараф этиш бўйича кенг кўламли тадбирлар амалга оширилди.

 

Вазирлар Маҳкамасининг 2025 йил 8 февралдаги 59-Ф-сон фармойиши асосида пойтахтда 12 та ҳудудий ишчи гуруҳ тузилди. Уларнинг таркибига вазирлик ва идоралардан 150 нафардан ортиқ мутахассис жалб қилиниб, саноат корхоналари, иссиқхоналар ва бошқа объектларда экологик талабларнинг бажарилиши мунтазам назоратга олинди.

 

Ўтган давр мобайнида 1452 та объект хатловдан ўтказилиб, 174 та тунги рейд ташкил этилди. Натижада 281 та қонун бузилиш ҳолати аниқланиб, 154 нафар шахсга нисбатан маъмурий баённома тузилди, 20 та объект фаолияти вақтинча тўхтатиш учун судга киритилди. 179 та қонунбузарлик бартараф этилди. Шунингдек, корхоналар томонидан 11 та замонавий қозон, 19 та фильтр ва 12 та чан тозалаш ускуналари ўрнатилди.

 

Экологик барқарорликни таъминлаш мақсадида “Яшил белбоғ” лойиҳаси доирасида йирик саноат корхоналари ҳудудида дарахт экиш ишлари бошланган. 2025 йилда 200 минг туп дарахт ва бута экилиши белгиланган бўлиб, баҳор мавсумида 79 490 туп кўчат ўтқазилди.

 

Бундан ташқари, “Тоза ҳаво” республика ойлигининг биринчи босқичи (10 апрель – 10 май) давомида 40 мингдан ортиқ автотранспорт воситаси текширилиб, 586 та машинада меъёридан ортиқ чиқинди газ чиқарилиши аниқланиб, камчиликлар бартараф этилди. Натижада 4,7 минг тонна зарарли ташламаларнинг атмосфера ҳавосига чиқарилишига йўл қўйилмади. Ҳозирда мазкур ойликнинг иккинчи босқичи (10 сентябрь – 10 октябрь) Тошкент шаҳрида давом этмоқда.

 

Пойтахт ҳавосини тоза сақлаш ва ифлосланиш манбаларини камайтиришга қаратилган тадбирлар изчил давом эттирилмоқда.