Иситиш мавсумида эҳтиёжманд оилаларга ёрдам пули берилади
Моддий ёрдам пулининг миқдори 1 млн сўмни ташкил этади.
2025/2026 йилги иситиш мавсумида эҳтиёжманд оилаларни қўллаб-қувватлаш мақсадида ноябрь ойида бир марталик моддий ёрдам ажратилади. Бу ҳақида Ижтимоий ҳимоя миллий агентлиги хабар бермоқда.
Президент қарорига кўра, 1 миллион сўм миқдоридаги ёрдам қуйидаги тоифадаги оилаларга берилади:
— “Ижтимоий ҳимоя ягона реестри” орқали болалар нафақаси ёки моддий ёрдам олаётган оилалар;
— “Камбағал оилалар реестри”га киритилган оилалар;
— “Маҳалла еттилиги” томонидан тузилган қўшимча рўйхатга киритилган оилалар.
Қўшимча рўйхат шакллантирилаётганда қуйидагиларга устуворлик берилади:
— боқувчисини йўқотган оилалар;
— таркибида I ёки II гуруҳ ногирони бор оилалар;
— ногиронлиги бўлган болани парваришлаётган оилалар;
— газ таъминоти мавжуд бўлмаган ёки марказлашган иситиш тизимисиз кўп қаватли уйда яшовчи оилалар;
— бир хонадонда 3 ва ундан ортиқ оила бирга яшайдиган оилалар;
— узоқ муддатли даволанишни талаб этувчи оғир касалликка чалинган шахс яшайдиган оилалар;
— ёлғиз кексалар ва ногиронлиги бўлган шахслар яшайдиган оилалар.
Мазкур ёрдамни олиш учун эҳтиёжманд оилалар жорий йилнинг 25 сентябрига қадар “Маҳалла еттилиги”га мурожаат қилиши керак.
